Slikarski velikan, Vojo Stanić proslavio je prije par dana 95. rođendan.

“Nemam ja šta da slavim rođendan, rođendani se slave kada si mlad, a ne kad imaš sto godina“, u svom stilu je za Herceg Novi Cool rekao veliki slikar Vojo Stanić.

Novinari su ga zatekli u kafeu Stanica na Škveru, gdje svaki dan ode na kafu, a gdje su mu domaćini i priredili iznenađenje i napravili mu rođendansku tortu.

“Stid me koliko puno godina imam, mada ih nisam nikada krio“, kazao je Vojo i ugasio svjećice na svojoj rođendanskoj torti.

Na pitanje kako obilježava svoj rođendan legendarni umjetnik sa Škvera kaže da je za njega to dan kao i svaki drugi.

“Jedan od milion dana“, kaže svjetski poznati slikar iza kojeg je skoro 80 samostalnih i više od 150 kolektivnih izložbi.

On vrlo rijetko daje intervjue i vrlo rijetko priča za medije, tim više je ovaj momenat za portal Heceg Novi Cool jako značajan i privilegija koju su imali zahvaljujući ljubaznosti osoblju kafea Stanica na Škveru, a to su iskoristi samo toliko da pitaju velikog umjetnika da uporedi svoj grad nekad i sad:

“Herceg Novi ima sad više umjetnika nego ikad i ima i dalje epitet grad umjetnika, međutim Novi je, po mom računu, u nekom civilizacijskom smislu i kulturnosti građanstva, bio daleko kulturniji grad prije 50 godina nego sad“, kroz smijeh je kazao Stanić i posvetio se svojoj svakodnevnoj rutini – kratkom espressu, čaši crvenog vina i luli.

izvor: hercegnovicool