U okviru književnog dijela manifestacije “Podgoričko kulturno ljeto 2018” u petak 31. avgusta u Velikoj sali KIC-a “Malesija” Tuzi, sa početkom u 19 sati biće predstavljena knjiga “Sebijini snovi” novinara i književnika Ruždije Adžovića.

O knjizi će govoriti Šahin Šišić, Mirsad Rastoder i autor.

“Riječ o knjizi pripovijetki koje govore o životu ljudi, uglavnom Bošnjaka, u Bosni i Hercegovini i Crnoj Gori, o njihovim sudbinama, navikama, običajima. Radnja polovine pripovijetki ‘Sebijini snovi’ smještena je u Sarajevu, Tuzli i mnogim neimenovanim bosanskim čaršijama, a druga polovina u Podgorici, Tuzima, Bijelom Polju, Beranama”, saopštili su organizatori festivala.

Recenzije za knjigu “Sebijini snovi” napisali su poznati pisac i akademik Abdulah Sidran i crnogorski književnik, prof. dr Novak Kilibarda.

Ruždija Adžović je rođen 1962. godine u Podgorici. Profesionalni novinar je od 1986. godine. Trinaest godina je radio kao novinar i urednik na Radiju Crne Gore. Pisao je za mnoge časopise i dnevne listove. Bio je i novinar i urednik u nekoliko dnevnih novina u Sarajevu. Adžović je u književnost ušao sa monografijom “Merhamet – 100 godina”, objavljenom u čast stogodišnjice Muslimanskog dobrotvornog društva “Merhamet”. Nakon nje slijedi knjiga “Sto godina dobročinstva Merhameta”, koja je objavljena u Turskoj i prevedena je na turski jezik. Objavio je romane: “Ogrlica iz Šanliurfe” (2014), “Kilibarda-Sarajevski dani” i “Sebijini snovi ” (2017).

Izvor: RTCG